“Адиз Раджабов мени қучоқламасин” деб йиғлаган Севара Солиева!

Бугунги сухбатдошим билан интервью уюштириш фикри унинг илк дебют бош рол ижро қилган “Пойма-пой” фильмини томоша қилгандан сўнг туғилди.

Филмни рекламаси ва унга куйланган Нилуфар Усмонованинг “Армонли мухаббат” қўшиғига ишланган клипдаги бу қизни илк кўрганимда, Дилноза Кубаева яна фильмда суратга тушишга қайтибди деб ўйладим. Кейин яхшилаб қарасам, йўқ у эмас, лекин, жуда ўхшаш. Нахотки синглиси бор ва у хам  опасининг машхурлигидан қизиқиб, актриса бўлишни танлади деб ўйладим.  Премьерада сахнага чиққан фильм ижодкорлари орасидан уни таниш қийин кечди, чунки хаётда у бошқачароқ, яъни Дилноза Кубаевага ўхшамасди. Балки фильм ижодкорларининг бу стретегик йўли?

Кино оламига илк қадамлари билан кириб келган янги актриса Севара Солиевани кутиб олинг. Сухбатдан сўнг ўз хулосам билан танишасиз.

Севара “Ўзбекфильм”да учрашиши мумкинлигини айтди ва белгиланган кун ва соатда келганимда, фильмнинг иккинчи ёрдамчи режиссери Дурдона билан бирга кутиб олди. Айтишига қараганда улар иноқ дўст эканлар.

Сухбат “Ўзбекфильм”нинг хоналаридан бирида кечди.

Солиева Севара Анварбековна,

1990 йил 12 июль Тошкентда туғилган,

маълумоти тугалланмаган олий,

Тошкент давлат Санъат институти 2 курс талабаси,

устози  ўқитувчи Нодира Хожиқулова,

 турмушга чиқмаган,

суйган хонандалари Кристина Агиллера, Уитни Хьюстон, Юлдуз Усмонова.

“Пойма-пой” фильми бош роль бўйича биринчи дебьют фильми, авваллари “Амакиваччалар” фильмида уч кўринишда: ўғилболасифат қиз, замонваий қиз ва миллий кўринишда эпизодини талқин қилган.

“Сўнгги лахза” фильмида  Алишер Узоқовни синглисини талқин қилган. Афсуски бу фильмдаги унинг роли қисқартирилиб, деярли билинмаган ва кичик сахналарда кўринган холос.

Шунингдек “Чол ва набира” давлат кинофильмида одобли набира қизни талқин этган.

Қандай қилиб бу фильмга бош рольга, яна Адиз билан тушиб қолдингиз?

-Дурдона опам мени таклиф қилдилар. Кастингда хар хил институтлардан 130га яқин қизлар қатнашишган.

Бу фильмдан сўнг журналистлар фикри иккига бўлинди. Салбий тарафлама ёндошагнларнинг фикрича “шаллақи” қиз образини яратибсиз.

-Худони ўзи асрасин хаётда бундай бўлишдан, лекин бу сценарий менга берилган вазифа. Хаётда бундай ўзимни тута олмасдим хеч қачон.

Дилноза Кубаевага тақлид қилгандексиз?

-Менга Диноза Кубаева жудаям ёқадилар. Билмасам, фильмда мени сочларимни шундай турмаклашганигами, ва дубляжда қахрамонимга айнан Дилноза Кубаева овоз берганларигами шу фикр туғилган бўлиши мумкин. Вахоланки фильмга чиқишимдан аввал хам кўп ўхшатишган.

Балки Дилноза хозирда оилалик бўлиб уни фильмга таклиф қилиш иложиси бўлмаганидан Сизни атайин ўхшатишга харакат қилишгандир? Балки янги актрисани Дилнозага ўхшатиб кўтариш осон кечар деган фикрлар бўлгандир? Нима деб ўйлайсиз?

-Йўқ, мен ўйлайманки, шунақамас. (жавоби ва охнаги жуда қизиқ ва кулгули чиқди, ўзи хам кулиб юборади).

Режиссерларга маъқул келгангизни унда нимадан деб ўйлайсиз?

Шунчаки кастингда иштирок қилдим, у ерда фильмдаги қиз билан урушиш сахнаси бор-ку, “Шилпилдоқ” деб бошланадиган, ана ўша сахнани кўрсатиб бериш керак эди, кўрсатдим. Яна кечқурун Адиз қахрамони келадиган сахнани хам топширдим.

Хўш қалай Сизга Адиз Ражабов? Яъни ишлаш у билан?

-Яхши, кўп нарсани ўргатдилар  суратга олиш жараёнида. Хаяжонланманг, уялиш керак эмас деб қўллаб-қувватлаб хам турдилар.

Нима учун қахрамонингизга ўзингиз овоз бермадингиз?

-Чунки мен хали ўрганишим керак дубляж ишини хам. Овоз бериш қийин, уни ўзига яраша  техникаси бор. Ниятим бор дубляж ишини ўрганишга. Кейин ўзимни қахрамонларимга ўзим овоз бермоқчиман.

Фильмдаги баъзи сўзлар оғир ботмадими? Бу фильм деб тушуниб турган тақдирда хам, барибир фильм орқали учар сўз ва лақаб бўлиб қолиб кетиши мумкин бўлган сўзлар, “пингвин” ва хоказо...

-Йўқ, тушунаманку фильм эканлигини.

Яна бир асосий сахналардан бири, билмасам балки ижодкорлар умуман бошқа нарсани кўрсатишмоқчи бўлишган, балки...балки ва балки...Хуллас шундай бир “интригующий” сахна қилинганки, томошабинларни бузуқлик даражасини текшириш сифатида деб, шахсан  мен   шундай қабул қилдим., қоғозга ўралган бир кўриниш. Бу нарсани англаш учун, яъни бу қалтис хазил кўринишни тушуниш учун ё инсон  ўзи бузуқ бўлиши керак, ёки шундай сахнаси бор фильмни кўрган бўлиши керак ё бошидан ўтказган бўлиши керак.

Билмасам Сиз тушундингизми буни ўзингиз...Хозир қайси, қайси жойи десангиз хам керак.

-Йўў, ман тушундим...(Мана шу пайт хонада кулгу кўтарилади, Севара эса икки қўли билан оғзини ёпиб жилмайиб қизариб ўтирарди)

Ия қаердан тушундингиз? Айтганимдек бу нарсани тушуниш учун ё инсон  ўзи бузуқ бўлиши керак, ёки шундай сахнаси бор фильмни кўрган бўлиши керак ё бошидан ўтказган бўлиши керак, демак қайси бири?

-Йўў унақамас, биламан кўп ёшлар хозир шунақа ўйлашадида... (Севара қизариб тутила бошлайди) Йўў энди...э ман   қўрқаман ...

Дурдона кулгудан ўзини зурға тутиб сухбатга қўшилади:

-Кўриб турганингиздек бошқача қиз бу хаётда, уялчанг ва содда, шунинг учун хам соддалик қилиб гапириб юбораверади. Гап шундаки, суратга олиш жараёнида фильм ижодкорлари хазил қилиб роса кулишган, шунда билган.

Айтишганми Сизга Севара?

-Йўқ айтишмаган.... (бирдан жимлик ва яна кулгу кўтарилади) Йўў қўрқвомман (кулади)

(Дурдона хандон отиб кулаётиб Севара билан қараб қўйишаётганидан тушунишим бўйича Дурдона унга тушунтирган). Ман масалан тўғри тушунаман, балки “прикол” учун қилингандир деб.  Лекин суратга олиш жараёнида ўзимга хеч қандай ёмон фикр келмаган, тўғриси. Кейин экранда фильм кўряпганимда, ўшанда балки...Хамма кулди, нотўғри ўйлаганига..Суратга олишда эса умуман хаёлда бўлмаган, мен ўзимни ишимни қилганман холос.

Ўйламаганмисиз, биринчи фильм, қиз боласиз, кейинги хаёт олдинда бор..

-Тушунмаганман хам у пайт, балки мени хатоимдир.

Тушунмаган деган тақдирда хам Адиз билан  ўпишиш учун бўйин чўзилган сахналар...

-Йўў хич унақа нарсалар бўлмади..

Дурдона:

-Биринчи бу роса уялди, айниқса қахрамони онаси ўлган пайти сахнасида Адиз буни қучоқлайдиган сахна бор-ку, шуни ўйнамайман деб туриб олди, буни кўндиргунимизча мен адойи тамом бўлдим. Мен уяламан, эртага хам хамма хар-хил гапиради, мани кучоқламасин-деб роса йиғлаган.

Яна бир қизиқ сахна, гримерларни билмадим, ижодкорларни хаёли қаерда бўлган бу хам тушунарсиз, қахрамон қизни пластик операциядан сўнг бойлоғични ечгандан сўнг унинг юзида операциядан сўнг чандиқ,  хеч булмаса чизиқ ва из йўқлиги майди, лекин, қиз бўянган холда... Юз бойлоғичда бўлган пайт қандай қилиб бўянган экан деган савол туғилиши табиий, чунки билиниб турибди, Сиз шунга ўзингиз ахамият бермадингизми?

-Мени хам лекин хаёлимга келди. Гримерни хатоси бўлиши мумкин. Тўғри шу гапингиз хам. Хаёлимга келиб айтмоқчи эдим, лекин, улар барибир ўз ишини устаси, уларга ўргатаётгандек кўринмай дедим.

Фильмдаги қизнинг кийимлари  ажаблантирди. Воқеа адашмасак пойтахтда кечаётганини назарда тутсак, бунақа кийинишмайди қизларимиз.

-Камбағалнинг қизи-ку.

Биздаги камбағаллар хам хозир кечирасизу шимда юришади. Айтмоқчи бўлганим қахрамон кийимлари жудаям осилиб кетган, жуда хам ночор ва ўзига ярашмаган бесўнақай кийимлар. Бундай кийимлар кийиш учун хиндистонлик суперкамбағал бўлиш керак.

-Шимда кўринган сахналар борку.

Дурдона:

-Осилган кўйлаклар турмушга чиққанидан сўнг бўлган. Фильмнинг бошида қиз шимда бўлади.

Фильмнинг бошидан ярми қувноқ ва бу осонроқ кечса керак, лекин ярмидан охиригача трагик драма, мана шу сахналарни талқин қилиш қандай кечди Сизга? Кўр бўлиш, йиғлаш...

-Ўзи сиқилиб кетгандим, яқин олиб ўзимни кўр қиз деб хис қилдим, ва озгина сиқилиб кетдим. Озгина эмас, анчагина.  Юрагим ёмон бўлиб кетди. Кейин шифохонадаги бойлоғични боғлаётган сахналарида ўзимни ёмон хис қилдим.

Қайси сахналари ёқмади фильмни ва шу сахна бўлмаса бўларди деган фикр келган?

-Боғични боғлайдиган сахнаси. Айнан халиги Сиз сўраган, Адиз ўпмоқчи бўлган сахнада боғични боғлаган сахнам ёқмади албатта ва у чиқмаса бўларди деб хохлагандим.

Ёққан сахналарчи?

-Охирги сахнаси уйга қайтган сахнамиз.

Актерлардан кимлар ёқади ва кимлар билан рол ижро қилган бўлардингиз, масалан Улуғбек Қодиров, Фаррух Соипов...

-Билмасам, лекин улар билан рол ижро қилган бўлардим.

Адиз билан яна рол чиқса рози бўлармидингиз?

-Ха яна бирга ишлаган бўлардим.

Актрисалардан кимлар ёқади?

-Албатта Дилноза Кубаева ва албатта Раъно Шодиева. Ва фильмда мени онамни ролини талқин қилган Барно Кодировани жуда хурмат қиламан.

Дилноза билан учрашганмисиз?

-Асли биз бир мактабда ўқиганмиз, улар катта синфда мен кичик. Яна бир махалладанмиз, мени оиламни танийдилар. Афсуски актриса бўлганларидан кейин кўришиш имконияти бўлмади чунки улар кўчиб кетишганди. Телефон орқали сухбатлашиб турамиз.

Суратга олиш жараёнидан қизиқ воқеалар

-Хамма воқеалар ўзига яраша қизиқ бўлган, кўз кўр бўлиб қолгандаги сахнадаги гримда кўзларим юмилиб қолганди, фильмда унчалик кўрсатилмаган, лекин суратга олиш пайтида   жуда қизиқ холат бўлган. А! Яна, иккиқат бўлиб ДАН ходимини алдайдиган сахнада бақирганимда жуда қизиқ бўлган, одамлар хаммаси қараб ўтган, ишонишган.

Дурдона Сизга шу фильмдаги иккинчи режиссер  деб берадиган саволим:

Фильм охири жуда тез ривожланган воқеалар.

Дурдона:-Фильм нормал ривож олган бўларди воқеалар, лекин 20 минутдан ошиқ жойлари кесилиб ташланган. Фильм 2 соатдан ошиб кетса томошабин зерикиб қолади деган нарса бор. Шунинг учун қисқартирилиб анча жойлари кесилиб кетган.

Операциядан сўнг излар ўрнига бўянган

Дурдона:-Гримерлар хатоси бўлгандир, бизлар хам ахамият бермабмиз. Операциядан сўнг-ку

Операциядан сўнг излар қолмайдими? Ёки ағдарилган иссиқ суюқлик айнан икки кўзига мўлжалланиб тушиб икки кўзидан четга чиқмаганми?

Дурдона:-(кулади) Укаси мошинани сотиб пул олиб келиб бердику шунга операциядан сўнг излар хам қолмаган.

Севара:- Супер операция, кино-ку. (Кулади)

Халиги сахнага келсак, Адиз ўпмоқчи бўлган сахнадаги қоғозга ўралган хазилни ким ўйлаб топган?

Дурдона:- Буниси сир. (кулади) Айтолмайман.

Қандай қилиб мехмонхонада ишлаётган қиз бирдан ресторанда ишлай бошлайди?

Дурдона:-Айтдим-ку, кўп сахналар қирқилган, асли Адизнинг қахрамони буни ишдан бўшаттириб юборади, чунки қиз уни устидан кулди-ю, жахлда ишдан бўшаттирган бўлади. Қиз айланиб унинг ўртоғини ресторанига ишга киради.

Тақдир тақозоси билан а? Яна тақдир тақозоси билан айланиб бирдан унинг уйида ишлайдиган аёлнинг қизи бўлиб чиқиб уларнинг уйида ишлай бошлайди-а? Бу Мексиканинг сериалларидан олмаганмисизлар бу фильмни? Ёки Бразилия?

Дурдона:-Унисини билмадик (кулади)

Қайсидир фильмдан олинган дейишди хам.

Дурдона:-Билмасам сценарийни биз ёзмаганмиз.

Севара, таклифлар тушяптими, қандай режалар олдинда, энди фақат бош ролларни ижро қилишдаги мавқени ушлайсизми?

-Йўқ гап бош ролни ушлаб туришда эмас. Тўғрисини айтсам мен хозир ўқишим керак, таклифлар хозирча йўқ, фильм энди чиқди, ўқитувчим Нодира опа   бир фильмга сўрашяптганди  дегандилар, кўрамиз. Фильмни кўриб хали устимда ишлашим керак деган фикрга келдим. Ролимдан қониқмадим.

Сиз истаган роль у қандай бўлиши керак?

-Яхши қиз, шаллақи эмас (кулади). Кейин комедик роллар яқинроқ. Шу фильмдаги ролимдан фақат энди шаллақи қиз  ролини беришади деб қўрқаман. Яхши қиз ролини ўйнашни хохлайман.

Ўзи яхши қизмисиз?

-Билмасам энди буни бошқа одамлар айтиши мумкин, ўзимга бахо бера олмайман.

Сухбатда рости Дилнозани кўп эслатди бу қиз. Нафақат кўриниши, балки овозлари хам ўхшаш. Севаранинг болалик беғуборлиги хали ўзида сақланиб қолганлиги, соддагина сухбатлашиши ва уялиб қизариб кетавериши нафақат унга ярашар, балки унга бўлган хурматни оширди.

Майли кимдир ўхшатмасин, майли ўхшамасин хам, лекин бир нарса уларни боғлаши аниқ, бу хам бўлса соддалик, очиқкўнгиллик ва тарбияси аъло даражада эканлиги сезилиб туриши.

Севара шундайлигингча қолишинг тилакдошман, гарчан ролингда ўзингга ёқмаган “шаллақи” образи билан танилаётган бўлсанг хам, хар холда хаётда актрисалардан сен ва Дилнозадек содда ва беғуборлиги сақланган санъат ахли борлигидан сўнгги воқеалардан тарозини тенг қўйишда инсоннинг кўнгли таскин топади.

Sayyod. Сардор Камилов.

ФИКР

"Пойма-пой" фильми премьерасидан мақола (суратлар билан қайта бойитилган)

Бош сахифага қайтмоқ